ILOILO CITY- Wala pa napat-ud kun san-o i-lift ang lockdown sa St. Paul’s Hospital Iloilo kasunod sang pagpositibo sa Coronavirus disease 2019 sang walo ka mga doktor.
Sa interview sang Bombo Radyo kay Atty. Roy Villa, spokesperson sang Regional Inter-Agency Task Force, iya ginpahayag nga ginahulat pa nila ang resulta sang reverse transcription polymerase chain reaction( rt-pcr) test sang mga nalakip sa contact-tracing sa mga naka-close contact sang mga doktor antes desisyunan ang pagbawi sa lockdown nga ginpatuman umpisa sang Hunyo 29.
Suno kay Villa, magluwas sa resulta sang reverse transcription polymerase chain reaction( rt-pcr) test, kinahanglan nga natapos man sang ospital ang pagpatigayon sang disinfection.
Sa bahin naman sang Pedro L. Gindap Municipal Hospital sa Barbaza, Antique nga ginpaidalom man sa lockdown bangud sa pagpositibo sa Covid-19 sang isa ka doktor, ginpahayag ni Villa nga kasubong nga proseso man ang pagaagyan antes ma-lift ang lockdown.
May kaangtanan naman sa Modified General Community Quarantine status (with strict local action) sang Western Visayas, ginpahayag ni Atty. Villa nga sa bag-o nga category, mas mahatagan poder ang mga Local Government Units nga magpatuman sang localized approach sa pandemya kag mas makapatuman sang mas strikto nga mga pagsulundan.
Nahibaluan nga gintunga sa duha ka kategorya ang MGQC nga amo ang “strict local action” nga nagalakip sang zoning, localized community quarantine, strict enforcement ukon minimum health standards, kag scale up sang health systems; samtang ang isa ka kategorya amo ang naga-classify sang iban nga area bilang “low risk.”
