IWATE PREFECTURE, JAPAN – Isa ka maayo nga tion para sa self reflection ang ginapangatubang nga pandemya kun sa diin ginadumili-an ang pagpatigayon sang mass gathering kasubong sang misa sa simbahan.
Ini ang panugyan ni Father Garry Gestoveo, Congregation of the Immaculate Heart of Mary missionary priest sa Iwate prefecture sa Japan, may kaangtanan sa ginapatuman nga lockdown.
Suno kay Gestoveo, suspendido ang pagpatigayon sang misa kag sa baylo, communion na lang ang ginapatigayon sa tagsa ka parokya sa Iwate prefecture kun sa diin halos 1% lamang ang populasyon sang mga kristiyano sa bug-os nga Japan.
Ginpahayag ni Gestoveo nga apisar tuman ka importante ang pagpatigayon sang misa apang indi mahimo nga ibutang sa risgo ang ikaayong lawas sang mga deboto kag agud nga mapanginpuslan ang lockdown, gamiton ini nga tion para sa self reflection bangud nga ang aton tagsa ka kaugalingon ang ginakabig nga Temple of God.
Apisar sang negatibo nga epekto sang Coronavirus Disease 2019 (COVID-19), tion man ini agud nga mas mapalapit ang kaugalingon sa Ginuo kag magpasalamat sa tanan nga grasya nga nabaton.
