ILOILO CITY – Nagdangat sa apat ka mga heritage buildings sa Iloilo City ang delikado.
Sa interview sang Bombo Radyo kay Engr. Mavi Gustilo, pinuno sang Office of Building Official, iya ginpahayag nga nagpatigayon sila sang inspeksyon sa mga heritage buildings sa dalan Iznart, Ledesma, Arroyo, kag JM Basa sa Iloilo City Proper.
Suno kay Gustilo, sa 35 ka mga heritage buildings, apat sa mga ini ang makabig na nga delikado matapos wala nakasulod sa minimum requirement sang National Building Code.
Lakip na diri ang Locsin-Coscolluela building nga nahamtang sa corner Ledesma-Iznart Street, Barangay Magsaysay sa diin sang nagligad nga semana, nagkaladagdag ang mga crystal sini.
Suno kay Gustilo, may yara sang mga litik ang pader kag beam, exposed ang steel bars, nagtagas ang tubig, kag nagaburambod ang electrical wirings sang nasambit nga building.
Nakig-angot naman sila sa tag-iya sang building kun sa diin nagpasugot ang mga ini nga i-demolish nalang ini.
Apang, nagapamalabag ang heritage committee bangud ginakabig nga isa ka heritage site ang Locsin-Coscolluela Building nga gintukod sang 1920’s.
Ginpahayag dugang sang natungdan nga ginatun-an na sang opisina ang posible nga solusyon kun sa diin prayoridad ang seguridad sang mga tawo.
