ILOILO CITY- Doble ang ginapangatubang nga kabudlay sang estado sang Louisiana, USA, matapos nga ginlaslasan ini sang makahahalit nga hurricane Ida sa tunga sang krisis dala sang COVID-19 pandemic.
Suno kay Bombo International Correspondent Sonia Provido Short direkta sa Estados Unidos, mayor nga problema amo ang pagkadula sang supply sang kuryente rason nga nabudlayan ang mga ospital nga mag- function ilabi na nga mayorya sang mga pasyente ang nagasuprir sang COVID-19.
Magluwas diri, may mga ospital man nga nagkalaguba rason nga ginpatigayon man ang evacuation sang mga pasyente.
Ginpahayag ni Short nga masobra 1 million ka mga tawo ang wala sang kuryente kadungan sang landfall sang hurricane kon sa diin duha na ang narecord nga napatay kag naghatag pa gid sang kakugmat sa mga pumuluyo sa ginbahaan nga mga lugar bangud sa presensya sang mga buwaya kon sa diin isa na ang nareport nga gin-atake sang amo nga sapat.
Dugang pa niya nga sa subong, nagapanghanda naman ang Mississippi kon sa diin siya nagaistar bangud ginalauman nga sunod nga magalabay ang hurricane sa nasambit nga estado kon sa diin nagpaandam na ang otoridad sa posibilidad sang pagluntad sang flash flood.
