Padayon ang pagbantay kag pagresponde sang lokal nga gobyerno sang Zarraga bangud sa padayon nga epekto sang bagyo kag habagat nga nagadala sang mabaskog nga ulan kag pagbaha sa banwa.
Ginbisita mismo ni Iloilo Second District Congresswoman Doc Kathy Gorriceta ang banwa sang Zarraga, kaupod ang iya bana nga si former Congressman Mike Gorriceta kag si Mayor Jofel Soldevilla, agud personal nga masiguro ang kahimtangan sang mga pumuluyo kag maghatag sang bulig sa mga apektado.
Sa interview sang Bombo Radyo Iloilo kay Congresswoman Gorriceta, iya ginpahayag nga personal siya nagkadto sa mga lugar nga naapektuhan kag gilayon nagpatawag sang initial nga meeting kaupod ang lain-lain nga mga opisina sang amo nga banwa agud maplanohan ang mga tikang kag masolusyunan ang problema sa baha.
Suno kay Gorriceta, isa sa mga ginatutukan subong amo ang pag-declog sang mga drainage, kanal, kag iban pa nga alagyan sang tubig, bangud ini ang ginakabig nga isa sa mga kabangdanan sang padayon nga pagbaha sa pila ka mga kabarangayan sa banwa.
Sa subong, padayon ang pagpanghatag sang relief goods kag mga bulong sa mga residente, ilabi na sa mga tigulang nga may kinahanglanon sang maintenance medicines.
