ILOILO CITY- Kalipay ang nabatyagan sang isa ka lola matapos nakagraduate sa kurso nga Bachelor of Science in Hotel and Restaurant Managament sa West Visayas State University – Calinog Campus sa edad nga 70 anyos.
Sa interview sang Bombo Radyo kay Marina Loloy, iya ginpahayag nga wala siya nagalaum nga matapos niya ang nasambit nga kurso bangud indi ini nangin mahapos para sa iya tungod sa iya edad.
Suno kay Loloy, sang una nagadul-ong siya sang iya apo nga naga-eskwela, kag didto man niya naisipan nga magbalik man sa pagtuon rason nga naglisensya ini siya sa iya mga kabataan kag siya man ang ginpasugtan.
Una siya nga gin-enroll sang iya nga bata sa Alternative Learning System suno kay Loloy kag sa ulihi gin-enroll na siya sa kolehiyo.
May mga tini-on man suno sa natungdan nga halos indi na siya magpadayun bangud may mga responsibilidad man siya nga ginatungdan lakip na ang pagpanghangkat bangud sa iya edad, apang gintinguhaan niya nga nga mag-tuon kaangay sang iban nga estudyante kag nagpursige agud matapos ang apat ka tuig nga kurso.
Sa subong suno sa natungdan luyag niya makapatukod sang magamay nga negosyo agud may yara man sila sang palangabuhian sang iya bana.
