Natukiban sa imbestigasyon sang awtoridad nga nakaguwa na sa nasunog nga balay sa Barangay Oñate de Leon, Mandurriao, Iloilo City ang 75-anyos nga biktima apang nagbalik pa ini kag ginapatihan nga may importante kuntani nga kuhaon.
Natabo ang fire incident pasado alas otso kaina sang aga, Agusto 2.
Sang nasapwan ang tigulang, nagahapa na ini sa kuwarto sa ikaduha nga panalgan sang balay kag napilpilan sang plastic cabinet.
Ginalantaw nga ang ginbalikan kuntani sini amo ang importante nga handumanan sa iya bana nga ginlubong sang nagligad gid lamang nga bulan.
Magluwas sa Lola, nakaangkon man sang second degree burn sa tangkugo, ulo, kag butkon ang iya utod nga babaye nga naga-edad sang 73-anyos. Nagapabilin ini subong sa ospital.
Sa pihak nga bahin, ang lalaki nga anak sang biktima ang nagsuprer sang first degree burn, samtang ang 12-anyos sini nga apo ang nakaangkon man sang paso sa abaga kag sa tiil.
Sa interview sang Bombo Radyo kay Fire Officer 2 Earl Anthony Darroca, arson investigator sang Iloilo City Fire Station, iya ginpahayag nga kandila ang ginalantaw nga ginhalinan sang sunog. Masami nga nagasindi sang kandila ang biktima kasunod sang kamatayon sang iya bana.
Sementado man ang dingding sang balay, apang may simpon nga light materials sa materyales sa sulod rason sang madasig nga pagmakot sang kalayo.
Nagalab-ot sa ginabanta nga P288,000 ang balor sang halit nga ginbilin sang insidente.
Sa separado nga report sang City Social Welfare and Development Office (CSWDO), magluwas sa nasunog nga balay, may kaiping man nga puluy-an nga nakaangkon sang partial nga halit.#
