Ma-imagine mo bala ang imo kaugalingon nga nagalantaw sang isa ka hampang nga nagalawig sang masobra isa ka adlaw?
Pat-od nga nagasalakit na ang imo likod kag matup-ay na ikaw sa katuyo. Apang ano pa gid ayhan kun ikaw mismo ang nagahampang?
Sa isa ka football field sa Luzhniki Olympic Sports Complex sa Moscow sa Russia, ginpatigayon sang damlag lang ang ginakabig pinakalawig nga football game!
Indi ini basta-basta bangud 26 ka oras ang ginlawig antes ini matapos!
Agud iselebrar ang All-Russian Football Day sang nagligad nga weekend, duha ka teams nga may tag-pito ka players ang nagtipon sa amo nga venue agud gub-on ang record sang longest football match sa bilog nga kalibutan.
Nagsugod ang game sang Sabado sang udto kag nagtapos sang alas dos na sang hapon sang Domingo.
Ang nauna nga record ang na-set sang 2014 sang naghampang ang duha ka teams sang dire-diretso sa sulod sang 24 hours.
Sa sini naman nga tion, ginlutos sang Red Team ang White Team sa skor nga 416 goals to 409.
Bangud ginhampang ini sa 7 vs 7 format, indi ini makonsiderar nga official football game. Wala man ini sang tyansa nga ma-validate sang Guinness Records apang sigurado nga magamarka ini sa Russian Book of Records.
