Ginalantaw sang otoridad nga ‘love triangle’ ang motibo sa pagtiro-patay sa lalaki sa Brgy. Madong, Janiuay, Iloilo.
Ang biktima amo si Rostom Llanora, 29-anyos, residente sang Aquino Nobleza West, Janiuay, Iloilo.
Sa interview sang Bombo Radyo kay Police Captain Jector Ayagan, Chief of Police Janiuay Municipal Police Station, iya ginpahayag nga may isa ka bulang nga karelasyon ukon nobya ang biktima nga mahimo maangot sa natabo nga krimen.
Suno pa kay Ayagan, nagahimo na sila sang mga tikang agud nga makapakig-angot sa nobya sang biktima agud mapadalman ang imbestigasyon.
Ginpahayag man sini nga yara sa drug watch list ang pangalan ni Llanora kag bag-o gid lamang natumod nga drug personality.
Kon balikan, nasapwan nga nagahapa sa dalan ang biktima kag may patal nga pilas sa likod nga mahimo tuga sang 12 gauge home-made shotgun.
Natukiban man sa lawas sini ang anom ka mga bala nga rason sang iya kamatayon.
Padayon naman ang maid-id nga imbestigasyon sang Janiuay PNP.
Ginalantaw naman sang iloy sang biktima nga indi holdup ang natabo bangud wala man sang nadula sa kagamitan sini.
Suno kay Linda Llanora, iloy sang biktima, iya ginpahayag nga nakaagi na nga gindala sang iya anak ang iya nobya sa ila balay nga residente sang Cabatuan, Iloilo.
Gintuad man sini nga ang biktima ang may nauna nga ka-live in kon sa diin, nagbunga sang duha ka mga anak nga lalaki.
