ILOILO CITY – Preso ang isa ka barangay tanod sang Barangay Poblacion, Bingawan, Iloilo matapos nagpaniro bangud sa ginaalegar pagpangimon sini sang madakpan ang karelasyon nga may iban nga lalaki.
Ang suspek nga si alyas Hernan, ang preso karon sa Bingawan Police Station kag natalana nga pasakaan sang kaso sang himata sang 17-anyos nga biktima nga natiruhan sini.
Sa interview sang Bombo Radyo, ginpahayag ni Police Inspector Ramil Jacaba, chief of police sang Bingawan Police Station nga may party sa puluy-an sang suspetsado kahapon bangud may Thanksgiving sa Simbahan.
Apang nagluntad ang kinagamo sang ginapahayag madakpan sang barangay tanod ang bayaw sini nga lalaki nga ginamolestiya ang 17-anyos nga biktima sa sulod sang isa ka hulot sa puluy-an.
Sang madakpan sang suspek, nagpalagyo ang menor-de-edad nga naka-brief ukon underwear lamang ang ginasuksok.
Ginapahayag nga may relasyon ang barangay tanod kag ang bayaw sini rason nga nagpangimon ini kag ginsapote ang bayaw samtang ginluthang naman sini ang menor-de-edad gamit ang 12-gauge shotgun.
Ang suspek ang may asawa apang ginapahayag nga isa ini ka bisexual kag kun mahubog nagaguwa ang iban nga personalidad sini.
Ang tatlo ang ginapahayag nga miyembro sang choir sa simbahan sa Bingawan, Iloilo.