Ginpanginwala sang Liberal Party nga ini ang sa likod sang ginapatihan ni Presidente Rodrigo Duterte nga tuyo pagpukan sang iya administrasyon.
Sa interview sang Bombo Radyo Iloilo kay Sen. Francis Pangilinan nga amu man ang presidente sang Liberal Party, gin-athag sini nga wala sila nagapakighimbon sa New People’s Army para pahalinon sa puwesto ang presidente.
Nagapati ang senador nga isa lang ini sa mga diversionary tactis sang administrasyon.
Suno pa kay Pangilinan, mismo si Defense Secretary Delfin Lorenzana kag AFP Chief of Staff Eduardo Ano ang nagpaathag nga wala sang padihot nga kudeta ang oposisyon.
Sa baylo akusaran sila sang conspiracy, mas maayo suno sa senador kun ang busision amo ang conspiracy sa Bureau of Customs nga rason kun nga-a nakalusot sa Pilipinas ang 6.4 billion nga balor sang illegal drugs gikan sa China.
Mangin ang kamatayon sang mga kabataan sa kampanya sa illegal drugs ang indi man dapat pag-ipasibangod sa Liberal Party bangud indi man sila ang nagauyat sa mga pulis.
Wala na gani suno kay Pangilinan sang ahensiya sang gobyerno ang gusto nga magpalapit sa ila partido bangud sa kahadlok nga kontrahon sang administrasyon.