Nag-develop na sa tropical depression ang low pressure area (LPA) nga nakit-an sa naaminhan-nasidlangan sang probinsya sang Batangas.
Ginhingadlan ini nga Dindo kag amo na ang ikaapat nga tropical cyclone nga nagsulod sa Pilipinas subong nga tuig.
Sa 11:pm nga bulletin sang Philippine Atmospheric, Geophysical, and Astronomical Services Administration (PAGASA), ginpahayag nga na-monitor ang Tropical Depression Dindo sa distansya nga 560 kilometers naaminhan-nasidlangan sang Itbayat, Batanes.
Yara man ini sa nasidlangan sang Taiwan kag sulod sa Philippine Area of Responsibility (PAR).
Dala sini ang kabaskugon sang hangin nga 55 kilometers per hour kag pagmadlos nga tubtub sa 70 km/h. Nagahulag ini pa nakatundan sa kadasigon nga 20 km/h kag ginalantaw nga magaguwa man gilayon sa PAR sa sulod sang 12 ka oras ukon subong nga Lunes sang aga.
Bangud malayo man ini sa Philippine landmass kag madasig man nga magaguwa sa PAR, wala sang ma-eksperyensyahan nga mabaskog nga ulan kag wala man sang tropical cyclone wind signals nga ginpasaka sa diin man nga bahin sang pungsod.
Pahayag pa sang state weather bureau, may “limited intensification” si Dindo sa sulod sang duha ka adlaw apang posible man nga mahimo ini nga tropical storm subong nga Lunes.
Ini ang una nga tropical cyclone sa Agusto. Matandaan nga gin-estimate sang PAGASA nga posible may duha tubtub tatlo ka tropical cyclones sa Pilipinas sini nga bulan.
