ILOILO CITY – Subong na nga adlaw ang full implementation sang enhanced Local Public Transportation Route Plan (LPTRP).
Sa interview sang Bombo Radyo kay retired Colonel Uldarico Garbanzos, pinuno sang Traffic Management Unit sang Iloilo City Government, iya ginpahayag nga ang nasambit nga tikang ang kasunod man sang pagtakop na sang deadline sang consolidation.
Suno kay Garbanzos, magapatigayon sila sang inspection sa mga terminal agud matsikyar kun may yara sang mga mabyahe nga mga unconsolidated jeepneys.
Ginpahayag sini nga pasugtan sa gihapon nga makabyahe ang mga traditional jeepneys, apang kinahanglan nga makapakita ang mga ini sang sticker sa ila salakyan nga makapamatuod nga consolidated na sila.
Nahibaluan nga may yara sang ginabanta nga 600 ka mga modernized jeepney ang nagabayahe sa syudad.
Ini kasunod sang 1,782 ka mga aprubado nga units sang modernized jeepney sa diin masobra sa 200 diri ang nagapabilin nga unconsolidated.
Ginpahanugutan naman ang kapin 241 ka mga public utility jeepneys nga naghalin sa first town municipalities nga makasulod sa syudad.
