Bangud sa nagadamo nga nagasulod sa Iloilo City halin sa nagkalain-lain nga probinsya kag banwa, ginakonsiderar na ang pag-review sang Local Public Transport Route Plan (LPTRP) agud masiguro nga matawhay ang pagsakay sang mga commuter, ilabi na sa rush hour kag mga adlaw nga may yara sang klase.
Sa interview kay City Legal Officer Atty. Joseph Edward Areño, ginpatuman ang LPTRP sang 2018 nga may panguna nga katuyuan nga mangin “efficient,” “effective,” kag “comfortable” nga pagsakay sa pampubliko nga transportasyon kag makadugang sang mga bag-o nga ruta.
Apang, nakita nga may pagbag-o sa sitwasyon sang siyudad, ilabi na sa nagadamo nga mga estudyante kag iban pa nga nagasulod sa Iloilo City kada weekday kag school day.
Bangud sini, ginalantaw nga kinahanglan na nga i-review ang dalagan sang plano agud ma-akomodar ang nagadugang nga demand sa pampubliko nga transportasyon.
Pahayag pa ni Atty. Areño, kinahanglan matun-an kun pila ka ruta ang kinahanglan dugangan sang mga unit ukon kung diin kinahanglan maghimo sang bag-o nga ruta.
Dugang pa niya, pinaagi sa pag-review sang LPTRP, ginapaabot nga mas mapahamtang ang mga ruta suno sa aktuwal nga demand sang mga pasahero kag malikawan nga indi magkulang ang transportasyon sa nagadamo nga sumalakay sa siyudad.
