“Gintapok lang ako di kag pabay-an sang apat ka adlaw na.”
Dismayado ang isa ka locally stranded individual (LSI) sa pagtrato sa iya sa quarantine facility sa Brgy. Tiwi sa Barotac Nuevo, Iloilo.
Sa interview sang Bombo Radyo kay Ramon Jastia, iya ginpahayag nga gin-quarantine siya sa SK Hall sa nasambit nga barangay umpisa Agusto 21 bangud halin siya sa Sagay City, Negros Occidental.
Suno kay Jastia, umpisa sang nagtinir siya sa SK Hall, wala sang health worker nga nagatatap sa iya kag siya na lang mismo ang nagamato-mato sa pagkuha sang iya kaugalingon nga body temperature.
Ang pagkaon suno kay Jastia ang ginadul-ong sang iya asawa nga amo man ang iya ginakabalak-an bangud mahimo nga ma-infect ini kun matuod nga positibo siya sa coronavirus disease 2019 (COVID-19).
“Te insakto na bala nga ako ang ga-check sang temperature ko? Maayo na bala? Indi bala obra nila na nga mag-monitor sang mga PUM? Isa lang ko di ya.”
Ginpakigbahin man ni Jastia nga sang nagligad nga adlaw, nagsakit ang iya tiyan kag nag-gwa siya sa SK Hall agud maglisensya sa Chief Barangay Tanod agud makapauli siya sa ila balay.
“Sang Domingo… kay bal-an mo sang adlaw, nagkaon ako sang talaba. Sang mga ‘las nueve sa gab-i, indi ko na maagwanta ang sakit sang tiyan ko. Nag-over the bakod ako kay makadto tani ako sa balay kay makuha ako sang bulong.”
Suno kay Jastia, gintawgan sang Chief Tanod ang punong barangay bangud sang iya ginhimo, kag pag-abot sang punong barangay, ginbuyayaw siya sini.
“Sila na mismo ang gahambal nga sa kadamo sang nagtinir di, ako lang ang gareklamo. Amo pa gid na ang ginakabak-an ko. Kay basi kun may nagtinir di nga OFWs kag wala ni na-disinfect ang lugar,” pahayag pa ni Jastia.
Kahapon, Agusto 25, ginkuhaan sang swab sample ang natungdan para sa COVID-19 test.
(Ginatinguhaan man sang Bombo News Team nga makuhaan sang pahayag ang barangay may kaangtanan sa sini nga reklamo.)
