Nagapanawagan ang mga locally stranded individuals kay Iloilo Gov. Arthur Defensor Jr. nga buligan sila nga makapauli sa probinsya sang Iloilo.
Nagapabilin ang mga LSIs sa North Harbor Pier 4 sa Metro Manila sa sulod na sang pila ka adlaw.
Sa interview sang Bombo Radyo kay Marjorie Baltazar, isa sa mga locally stranded individuals nga taga Balasan,Iloilo, iya ginpahayag nga Oktubre 13 sang gab-i kuntani ang ila nga byahe apang pagpadulong nila sa puerto, ila natukiban nga wala sang barko sa nasambit nga oras.
Suno kay Baltazar, ginhambalan lang sila sang tagdumalahan sang 2Go nga sila ang ‘chance passenger’ sa diin sila ang ma fill-in kun may yara sang pasahero nga indi makaupod sa 150 ka mga pasahero nga kinahanglanon sa isa ka trip.
Sa sulod sang lima ka adlaw, wala gid sang may naghatag sa ila sang pagkaon ukon tubig man lang.
Pahayag niya, wala na siya sang budget pa kun magdugay pa sila nga pamilya nga magapabilin sa nasambit nga puerto.
Suno naman kay Grace Escamilla, LSI gikan sa Guimbal, Iloilo, iya ginpahayag nga 57 sila tanan nga mga taga probinsya ang yara sa puerto.
Lunsay mga karton lang ang ginahigdaan nila kag ang makaluluoy amo ang mga kabataan bangud matun-og kag nagakahangawa ini nga mahimo didto pa sila malatnan sang COVID-19.
Sa pagkamatuod dugang pa sang natungdan, kumpleto naman ang ila mga dokumento.
