MANILA – Nagalaum nga makapauli sa Iloilo sa labing madali nga tion ang mga Locally Stranded Individual nga nagapabilin sa subong sa pantalan sa Metro Manila.
Sa interview sang Bombo Radyo sa isa sa mga Locally Stranded Individual nga nagpahinago lang sang pangalan, iya ginpahayag nga makaluluoy ang ila sitwasyon ilabi na kun mag-ulan.
Suno sa natungdan, nagalatag lang sila sang karton kag tarapal agud nga may matulugan apang sa tion nga magbubo ang ulan, kinahanglan nila nga maghalin sang pwesto kag hakuton ang ila dala agud nga indi mabasa.
Magluwas nga indi kumportable, ginpahayag man sang natungdan nga indi sila makakaon sang maayo kag wala man sang may nagagiya ukon nagahatag man lang sang update kun ano ang ila madangatan.
Ginpahayag sang natungdan nga isa siya ka tricycle driver sa Metro Manila apang bangud sa kapigaduhon sang kita, nagdesisyon siya kaupod ang iya pamilya nga magpauli na lang sa Brgy. Banguit, Cabatuan, Iloilo.
