ILOILO CITY- Ginkwestyon ni Abang Lingkod Party-list Representative Joseph Stephen Paduano ang kontrobersiyal nga si Police Lieutenant Colonel Jovie Espenido kun ngaa nagpadulong ini sa Iloilo City sang tion sang pagpamuno ni anay Mayor Jed Mabilog agud mag-imbestigar tuhoy sa druga sang panahon sang administrasyon ni former President Rodrigo Duterte.
Sa ginpatigayon nga joint public hearing sang House Quad Committee, ginpamangkot ni Paduano si Espenido kun sin-o ang nagsugo sa iya agud magpadulong sa Iloilo City kag magtinir sang duha ka bulan apisar nga wala man sang pormal nga mando sa iya.
Nagsabat naman si Espenido nga mismo si former Police Regional Office 6 Director Rene Pamuspusan ang nagsugo sa iya apang ini ang verbal lamang kag wala sang pormal nga sulat.
Matandaan nga sang panahon ni Duterte, gin-angot sini si Mabilog sa narcotics trade, amo man sanday Mayor Rolando Espinosa Sr. sang Albuera, Leyte province, kag Mayor Reynaldo Parojinog Sr. sang Ozamiz City, Misamis Occidental province sa illegal drugs.
Si Espenido amo ang Albuera police chief sang gin-raid ang subprovincial jail sa Baybay City, sa diin napreso si Espinosa sa drug charges, kag ginluthang -patay ang alkalde kag isa pa ka inmate sa gin-alegar nga shootout sang Nobyembre 5,2016.
Si Espenido ang gin-deploy man sa Ozamiz bilang chief of police kag sang Hulyo 30,2017, patay si Parojinog kga 14 ka iban pa kalakip na ang iya asawa sa police drug raid.
Ginpatihan nga sang gin-assign si Espenido sa Western Visayas, target nga patyon man si Mabilog rason nga wala pa man kaabot si Espenido sa Iloilo, nagbiya na si Mabilog padulong sa luwas sang pungsod para sa iya seguridad kag sang iya pamilya.
Ginsuhestiyon naman ni Paduano nga imbitaron si Mabilog nga magtambong sa hearing agud magsabat sa pagbansag sa iya bilang drug protector kag pagtawag ni Duterte sa Iloilo City bilang Most Shabulized City.
