ILOILO CITY – Bukas ang Land Transportation Franchising and Regulatory Board Region 6 nga pamatian ang mga hinun-anon sang mga transport groups sa syudad sang Iloilo sa pagpahamtang sang premium point to point bus service hub sa Iloilo Business Park sa Mandurriao, Iloilo City.
Sa interview sang Bombo Radyo kay Atty. Ma. Josset Buyco Abellar, legal officer sang Land Transportation Franchising and Regulatory Board Region 6, iya ginpahayag nga handa ang ahensya nga klaruhon ang mga ginakwestyon sang mga transport groups.
Suno kay Abellar, ila lamang nga ginapatuman kun ano ang nasaad sa Memorandum Circular 2019-010 nga ginpaguwa ang central office kag ini ang napetsahan sang Marso 5, 2019.
Ang nasambit nga memorandum circular ang nagamandu sa regional office nga magbukas sang point to point bus service sa syudad sang Iloilo.
Dugang pa sang natungdan, kun indi nila pagtumanon ang memorandum circular sang central office, makabig ini nga isa ka paglapas.
