ILOILO CITY- Gintawag nga butigon kag ginpakamalaot sang presidente sang Pinagkaisang Samahan ng mga Tsuper at Operator Nationwide(PISTON)- Panay si Land Transportation Franchising and Regulatory Board Regional Director Richard Osmeña kag ang Office of Transport Cooperatives (OTC) .
Ini kasunod sang pagpamahog sang Land Transportation Franchising and Regulatory Board nga kanselahon ang prangkisa sang mga maupod sa strike kag ginmando man sang Office of Transport Cooperatives (OTC) nga automatic nga i-revoke ang accreditation sang mga accredited transport cooperatives kun magpakigbahin ang mga ini sa strike ukon magpatigayon sang protesta.
Sa interview sang Bombo Radyo kay Edgar Salarda, presidente sang Pinagkaisang Samahan ng mga Tsuper at Operator Nationwide- Panay , iya ginpahayag nga santo sa Memorandum Circular sang Land Transportation Franchising and Regulatory Board, wala nasaad nga mahimo nga mabawi gilayon ang prangkisa sang mga jeepney operators.
Suno kay Salarda, santo sa memorandum circular, multa lang mahimo idagdag sa sin-o man nga napamatud-an nga namilit sa isa ka driver ukon operator nga mag-upod sa transport strike.
Dugang pa ni Salarda, ginpatalang lang ni Osmeña ang iban nga transport groups agud mahadlok ang mga ini nga mag-upod sa strike.
