ILOILO CITY – Wala pa sang fare increase ukon pagsaka sang pamasahe sa Western Visayas.
Sa interview sang Bombo Radyo kay Atty. Ma. Josset Buyco Abellar, legal officer sang Land Transportation Franchising and Regulatory Board 6, iya ginpahayag nga sang nakaligad lang nga tuig sang ginpaguwa ang bag-o nga fare adjustment.
Suno kay Abellar, bag-o ipatuman ang saka sa pamasahe, kinahanglan anay nga magpasaka sang petisyon ang mga transport group.
Ginpahayag ni Abellar nga dungan nga ginapaguwa ang fare adjustment kag ang taripa sa diin ang ginahatagan lamang sini amo ang mga lehitimo nga Public Utility Jeepney Onwers kag Operators.
Nagakinahanglan nga makita sang mga pasahero sa jeep ang aprobado nga fare adjustment kag taripa.
May yara naman sang silot nga igahatag sa mga driver nga wala nagasunod sa fare adjustment.
Sa 1st offense, may yara sang multa nga P5,000, P10,000 nga multa kag 30 day suspension sa 2nd offense kag sa 3rd offense, nagalab-ot na sa P15,000 ang multa kag bawion na sang ahensya ang prangkisa sang salakyan.
