ILOILO– Gin-athag sang Land Transportation Franchising and Regulatory Board nga wala sila nagapang-agaw sang otoridad sang Iloilo City Council sa pagdesisyon kun sa diin paagyon ang mga bus sa syudad sang Iloilo kag traffic management.
Ini ang may kaangtanan sa kontrobersyal nga paghatag sang pahanugot sa megaworld nga magtukod sang transport hub sa diin, Iloilo City pakadto sa Iloilo International airport ang ruta.
Sa interview sang Bombo Radyo kay Atty. Ma. Josette Abellar, legal counsel sang Land Transportation Franchising and Regulatory Board 6, iya ginpahayag nga ang paghatag nila sang special permit sa transport hub ang santo man sa Memorandum Circular No. 2019-010 ukon ang Implementing Guidelines on the Opening of Proposed Additional Premium Point-to-Point Bus Services sa Iloilo City bangud ini ang isa sa mga highly urbanized City.
Suno kay Abellar, kun magdesisyon ang Iloilo City Council nga indi mahimo makalabay ang mga point-to-point buses sa isa ka area ang kwalipikado mismo nga aplikante ang nagakadapat nga mag-adjust kag magpangayo sang permiso kun sa diin sila mahimo makalabay.
Gin-athag man ni Abellar nga indi prangkisa ang ila ginhatag sa mga kwalipikado nga aplikante kundi ang special permit kag provisional authority sa mga buses nga maga-operate.
Kun ang aplikante ang kwalipikado kag may yara sang mga document evidence mahimo ang mga ini maka-apply para sa point-to-point certificate of convenience.
Dugang pa sang natungdan, ang polisa ang nagikan mismo sa central office sang Land Transportation Franchising and Regulatory Board kag sila sa Regional Office ang nagapatuman lang sa kun ano ang naaprubahan nga polisa.
