ILOILO CITY – Ginpamalabagan sang Land Transportation Franchising and Regulatory Board (LTFRB) ang ginaduso nga isa ka piso nga minimum fare hike sa jeep bangud sa nagapadayon nga pagsaka sang presyo sang gatong.
Sa statement sang LTFRB, magapabilin sa P9.00 ang minimum fare apisar sa petition sang transport group nga 1-Utak, Pasang Masda, ALDTODAP, kag ACTO.
Ginpahayag sang ahensya nga kinahanglan nga i-balance ang kinamatarong sang commuters nga nagasalig sa public transport system kag kinamatarong man sang mga operators nga maka ginansya.
Ginbasehan man sang ahensya ang pahayag sang National Economic Development Authority (NEDA) nga mahimo nga madula ang purchasing power sang general public sa tion nga mapasakaan ang pamasahe bangud magataas man ang presyo sang iban nga basic commodities kag services.
Dugang pa sang ahensya, may yara man sang iban nga remedyo ang gobyerno agud nga ma-address ang epekto sang nagataas nga presyo sang gatong pinaagi sa paghatag sang fuel subsidy nga nagdangat sa P6,500 sa tagsa ka public utility vehicle.
Samtang, naglab-ot na sa P700 million ang na-release nga fuel subsidies sa PUV lakip na ang mga jeep.
