Nagpaandam ang Land Transportation Franchising and Regulatory Board (LTFRB) sa mga transport operator nga magapatigayon sang transport strike subong nga semana.
Suno kay LTFRB Acting Chairperson Greg Pua Jr., sa tion nga magakulang ang magabyahe nga pampubliko nga salakyan, posible ang mga ini nga magpangatubang sang penalidad kaangay sang suspension nga mahimo pa maglab-ot sa franchise cancellation.
Pahayag ni Pua, P5,000 ang minimum sa pagabayran nga penalidad para sa first offense kag posible gid nga madugangan kun may ara sang mga repeated violations.
Kasunod ini sang plano sang Manibela nga three-day strike nga magasugod bwas nga adlaw, Sept. 28-30, kag ang protesta nga patigayunon naman sang grupo nga PISTON sa Setyembre 29 kag 30.
May kaangtanan ini sa mataas sa gihapon nga presyo sang produktong petrolyo, apisar sang ipatuman nga fare hike ukon pagtaas sang plete bwas nga adlaw.
Suno sa ila, wala nagakaangay ang magamay lang nga pagtaas sang plete sa presyo sang gatong.
Sa lunes, mangin epektibo na ang minimum fare nga P14 halin sa P13 para sa traditional jeepneys kag P17 naman halin sa P15 sa modern jeepneys.
