ILOILO CITY – Nagpagwa sang suspension order ang Land Transportation Franchising and Regulatory Board (LTFRB) sa Vallacar Transit.
Ini ang kasunod sang pagkahulog sang Ceres bus sang Abril 5, 2019 sa pil-as sa Brgy. Igbucagay Hamtic, Antique nga ginkamatay sang tatlo ka tawo lakip na ang bag-o graduate nga maritime student kag ginkapilas sang pito ka iban pa.
Sa ginpagwa nga mando ni LTFRB Region VI Director Richard Osmeña, suspendido sang 30 ka adlaw ang byahe sang tanan nga mga pulo ka mga ceres bus nga may ruta nga Iloilo City-Caticlan via San Jose vice versa.
Ang nasambit nga suspensyon ang epektibo subong nga adlaw matapos isungka sang Vallacar transit ang ila yellow plates kag dal-on sa LTFRB ang ila mga drivers.
Ginmanduan naman ni Osmeña ang Land Transporation Office (LTO), Philippine National Police-Traffic Management Group kag iban pa nga traffic agencies nga i-apprehed kag i-impound ang mga ceres bus nga may ruta nga Iloilo City-Caticlan via San Jose vice versa.
