ILOILO – Magahimo sang adjustments ang Land Transportation Franchising and Regulatory Board (LTFRB) sa malaba nga pagpila sang drivers agud nga makakuha sang Social Amelioration Program (SAP).
Sa interview sang Bombo Radyo kay Mr. Jeck Conlu, spokesperson sang COVID-19 Team sang Iloilo City Government iya ginpahayag nga nagsapol na sila sang LTFRB may kaangtanan sa pagginutok sang drivers sa ahensya nga nagresulta sang paglapas sa physical distancing.
Suno kay Conlu, nagpasalig ang LTFRB nga magapaggwa sila sang pagsulundan agud mangin matalunsay ang pagpila sang mga driver.
Nagpanugyan man ang natungdan sa mga drivers nga magsunod sa minimum health protocols bangud indi makabayad ang balor nga P6,000 nga ayuda kun matapikan ang mga ini sang COVID-19.
Nahibaluan nga ang nasambit nga SAP ang ginpatigayon sang Department of Transportation kag Department of Social Welfare and Development (DSWD) agud mabuligan ang mga drivers nga apektado sang COVID-19 pandemic.
