Nagpaathag ang Land Transportation Franchising and Regulatory Board Region 6 kon ngaa wala gilayon nga masolusyunan ang problema sa tunga sang mga taxi kag Grab car sa Western Visayas.
Sa interview sang Bombo Radyo kay Atty. Salvador June Altura, Legal Officer sang Land Transportation Franchising and Regulatory Board Region VI, iya ginpahayag nga bangud nga wala sang hurisdiksyon sa reklamo ang regional office, gin-forward ini sang talatapan sa central office.
Suno kay Altura, madugay na ang amo nga reklamo apang bangud man sa busy ang central office, wala ini gilayon nahatagan sang atensyon.
Ginpahayag man sang natungdan nga bangud sa amo nga sirkumstansya, ginhatagan sila sang awtoridad sang central office agud nga i-delegate ang hearing.
Ginapaabot naman sang LTFRB Region 6 ang mga dokumento halin sa amo nga opisina agud nga masugodan na nila ang hearing naangot sa panumbungon sang Association of Taxi Operators in Panay (ATOP).
