ILOILO CITY — Nagpangayo sang pasensya ang Land Transportation Franchising and Regulatory Board (LTFRB) Region 6 sa mga nagpatigayon sang protesta sagwa sang ila nga opisina sa Distrito sang Jaro bangud wala sila naatubang kag personal nga nasabat sang ahensya.
Sa interview sang Bombo Radyo kay Atty.June Altura, officer in charge sang nasambot nga talatapan, iya ginpahayag nga may ginabatyag siya subong kag posible ini ma-trigger sang mainit nga tyempo rason nga indi siya makaatubang sa mga drivers kag operators.
Suno kay Altura, apisar may mga ginaduso ang mga operators kag drivers, kinahanglan man nga intindihon nila ang mga pasahero kag ang posible nga maatubang nga konsekwensya kun wala sila ma-consolidate ilabi na ang safety sang mga nagasakay.
Nagpaathag man ini sa mga drivers kag operators nga wala na sila sang otoridad kun ang ginapalab-ot sa ahensya amo ang parti sa pagpanakop sa mga colorum bangud ang Land Transporation Office ang may ihibalo diri.
Nahibaluan nga masobra 3,000 ka mga drivers kag operators sa Region 6 ang posible nga maapektohan sang i-issue nga show cause order sang LTFRB 6 matapos ang kinse ka adlaw nga leeway nga ginhatag sang gobyerno para sa wala nakapa-consolidate.
