Nagawangal ang pila ka mga driver sang Public Utility Jeepney (PUJ) sa syudad sang Iloilo matapos wala sa gihapon nag-abot ang ginpasalig sang Land Transportation Franchising and Regulatory Board (LTFRB) nga P4,000 nga budget para sa ibakal nga android cellphone nga ginarequire sang ahensya sa pag-avail sang service contracting program.
Ang cellphone ang kinahanglanon sang mga driver sang jeepney agud maka-install sang application sang LTFRB sa diin marekord ang ila nga pagbyahe nga mangin basehan sang ila nga sweldo nagikan sa ahensya.
Sa interview sang Bombo Radyo kay alyas Ben, isa ka driver sang PUJ sa syudad sang Iloilo, iya ginpahayag nga natapos na sang Hunyo 30 ang service contracting program sang LTFRB apang wala pa sila sa gihapon nakabayad sa ila gin-utang nga cellphone.
Suno kay Ben, madamo siya sang kaupdanan nga nag-utang man sang cellphone agud nga maka-install sang application sang LTFRB.
Panawagan sang natungdan, kuntani solusyunan na ini sang nasambit nga ahensya bangud tuman na ka pin-ot ang ila kita tuga sang pandemya.
Samtang, pahayag naman sang misis sang isa ka jeepney driver, ginpasulabi pa sang iya nga bana ang pagbakal sang cellphone agud lamang nga maka-avail sang programa sang LTFRB.
Sa interview sang Bombo Radyo kay alyas Rose, nagabusong kag may tatlo ka mga kabataan, iya ginpahayag nga sa baylo nga ibakal nila sang gatas para sa ila duha ka gagmay pa nga bata, ginabayad pa nila ang ila kita para sa bulanan nga bayad sang iya bana sa cellphone nga gin-utang.
Suno kay Rose, makapila na nagpasalig ang LTFRB sa iya nga bana angot sa P4,000 nga budget para sa cellphone apang tubtob subong wala sila sang may nabaton.
Pahayag sang natungdan, kuntani paminsaron man sang LTFRB ang mga kubos nga jeepney driver kag untaton na ang pasalig nga wala man nagatupa.
