ILOILO CITY- Nagdepensa ang Land Transportation Franchising and Regulatory Board (LTRFB) may kaangtanan sa mas temprano nga pagpatuman sang Local Public Transport Route Plan (LPTRP) sa Iloilo City.
Ini kasunod man sang reklamo sang mga commuters may kaangtanan sa bag-o kag indi pamilyar nga mga ruta sang jeep sa syudad nga nagresulta sang pagsalangisag sang publiko.
Sa interview sang Bombo Radyo kay Atty. Salvador Altura Jr., hearing kag legal officer sang LTRFB- Region 6, iya ginpahayag nga ang ‘wisdom’ sa likod sini ang may kaangtanan sa ginapaabot nga pagbalik sang limited face to face classes.
Suno kay Altura, mas maayo nga subong pa lang, maantisipar na sang syudad ang posible nga scenario sa masunod nga mga binulan kung magabalik na sa normal ang set-up sang edukasyon kag magadinaguso na ang mga estudyante nga nagaeskwela sa syudad halin sa probinsya.
Pahayag ni Altura, dako ang mabulig sang temprano nga implementasyon sang LPTRP agud makahimo sang adjustment nga malakip naman sa
patigayunon nga amendments.
Gin-athag naman ni Altura nga coordinating agency lamang ang LTFRB kag wala sila sang otoridad nga magdikta sa Local Government Unit (LGU) nga amo naman ang may ‘final say’ sa implementasyon sang LPTRP.
