ILOILO CITY- Ginsipa sa pwesto si Land Transportation Office Region 6 Asst Regional Director Arturo Apolinar matapos ginreklamo sang mga traffic personnel sang Public Safety and Transportation Management Office (PSTMO) bangud sa pagpakatig-a nga magsunod sa traffic rules sa Iloilo City.
Sa interview sang Bombo Radyo kay Iloilo City Mayor Jerry Treñas, iya ginpahayag nga indi niya pagkunsentihin ang ginhimo ni Apolinar nga nagpalagas pa sa traffic enforcers tubtob sa iya talatapan sa LTO, kun sa diin siya nagpondo kag gin-atubang ang mga awtoridad.
Suno kay Treñas, ginpala-ot sa iya ni Department of Transportation Secretary Arthur Tugade nga ginmanduan na ni LTO Chief Edgar Galvante si LTO Region 6 Director Eric Lenard Tabaldo nga pahalinon sa pwesto si Apolinar.
Sa pihak sini, ginpat-ud sang alkalde nga dayunon sa gihapon niya ang pagpasaka sang kaso batok kay Apolinar nga gintawag niya nga abusado nga opisyal.
