Bukas ang Land Transportation Office (LTO) Region 6 sa integration sang theoretical driving seminar para sa mga estudyante sa mga eskwelahan sa rehiyon.
Sa interview sang Bombo Radyo kay Atty. Gaudioso Geduspan II, Director sang Land Transportation Office Region 6, iya ginpahayag nga isa ang tikang ka oportunidad agud nga madasig nga ma-edukar ang mga estudyante nahanungod sa insakto nga pag-drive.
Suno kay Geduspan, ang Drivers Education Center sa Bacolod City, ang nagapakig-angot man sa tagsa ka eskwelahan agud nga mapatigayon ang amo nga tikang.
Dugang ni Geduspan nga ginalantaw sang talatapan ang resolusyon nga nagamando man sa ila agud magpartisipar sa isa ka theoretical driving seminar sa probinsya sang Iloilo.
Indi paman matumod sang natungdan ang proseso sa paghatag sang certificate kasunod sang seminar apang, bukas ang talatapan nga maghatag sang student permit.
Nagpanugyan man si Geduspan sa mga estudyante nga may luyag nga magpasakop nga sundon ang mga requirements agud nga matalunsay sila nga matudluan.
Sa subong, wala pa sang pinal nga pagsulundan ang LTO-6 sa pagpatuman sang amo nga tikang.
