Ginkumpirmar sang Land Transportation Office (LTO)6 nga ang nagapanguna nga rason sang mga aksidente sa dalanon diri sa bahin sang Western Visayas amo ang recless driving.
Sa interview sang Bombo Radyo kay Atty. Gaudioso Geduspan, Director sang LTO 6, iya ginpahayag nga kalabanan sa mga na-involve sa mga aksidente sa dalanon amo ang mga wala nagasunod sa mga traffic rules kag mga wala naga-halong.
Suno kay Geduspan, nagapatigayon sang nagkalain-lain nga aktibidad kag programa ang LTO 6 para sa mga drivers agud nga mabuhinan ang mga nagakatabo nga mga aksidente ilabi na diri sa Western Visayas.
Madumduman nga nagpatigayon sang motorcade kun sa diin ginpangunahan sang LTO-6 upod ang mga katapo sang PNP, Iloilo City LGU, driving schools, Medical Clinics, Service Providers, Transport Cooperatives, Department of Economy, Planning and Development, kag LTFRB.
Sa subong mas ginapabaskog pa sang LTO-6 ang law enforcement, subong man driver’s education paagi sa seminars nga ginpatigayon sa regional office
Padayon man ang pagpakig-angot sang opisina sa mga Local Government Units para sa driver’s education program agud mangin responsable nga mga motorista.
Ang nasambit nga programa yara sa idalum sang Presidential Proclamation No. 115-A, kun sa diin ang bulan sang Mayo ginakabig nga Road Safety Month sa Pilipinas.
