Ginlockdown kag ginsirado ang opisina sang Land Transportation Office (LTO) Region VI sa Quintin Salas, Jaro Iloilo City matapos nagpositibo ang apat ka personnel sa COVID-19.
Sa exclusive interview sang Bombo Radyo kay Atty. Allan Sacramento, legal counsel kag pinuno sang operations division sang LTO Region VI, iya ginpahayag nga nag-ugat ang paglatnanay sang kaso sang COVID-19 matapos ginsubject sa Reverse Transcription Polymerase Chain Reaction (RT-PCR) test ang isa nila ka empleyado sang nagbusiness trip ini.
Suno kay Sacramento, nahibaluan nga nagpositibo ang amo nga empleyado kag ginmanduan niya nga magpaidalom ang tanan nga empleyado sang ila talatapan sa RT-PCR testing kag nagwa nga may nagdugang nga tatlo ka empleyado nga nalatnan sa nasambit nga virus.
Ginpahayag ni Sacramento nga kun madugangan pa ang numero sang mga empleyado nga COVID-19 positive indi pa nila mahimo buksan ang ila opisina.
Apang kun indi na madugangan ang mga empleyado nga malatnan sang virus, posible nga magbukas sila sa Lunes, Abril 19.
Nagpanugyan naman ang natungdan sa publiko nga magpadulong na lamang sa iban nga talatapan sang LTO kun may yara sang importante nga mga igaproseso.
Sa subong, until further notice ang paglockdown sang opisina sang LTO Region VI.
