Ginsuspender sang Land Transportation Office (LTO)-6 sa sulod sang 90 ka adlaw ang lisensya sang drayber 29-anyos nga optometrist nga involved sa hit-and-run sa Barangay Baldoza, La Paz, Iloilo City, sang Oktubre 11.
Suno kay LTO-6 Director Atty. Gaudioso P. Geduspan II, preventive suspension ang ini samtang ginapatigayon ang administratibo nga imbestigasyon sang ahensya.
Ginmanduan man ang optometrist nga magsumiter sang sulat nga paathag sa sulod sang lima ka adlaw halin sa pagbaton niya sang show cause order, kun ngaa indi siya dapat pasakaan sang administratibo ukon legal nga aksyon.
Ginatumod man sang LTO-6 sa ila imbestigasyon kon may paglapas ang drayber sa Section 48 sang Republic Act No. 4136 ukon reckless driving kag Section 55 nga nagatakda sang mga obligasyon sang drayber pagkatapos sang aksidente.
Kon indi makasumiter sang paathag sa ginpatuman nga deadline, pagabasehan sang LTO ang mga ebidensya nga yara na sa ila pagdesisyon sa kaso.
Text by: Bombo Jay Panizales
