Ginalantaw sang Land Transportation Office Region 6, nga magapangatubang sang sampaw-sampaw nga bayolasyon ang depampasahero nga jeep nga nakuhaan sang video sa Pavia People’s Terminal nga nagakarga sang lapaw pa sa kapasidad sini nga pasahero.
Sa interview sang Bombo Radyo kay Atty. Gaudioso Geduspan, Land Transportation Office (LTO) 6 Regional Director, iya ginpahayag nga delikado gid ang kaangay nga kadamuon sang mga pasahero ilabi na nga ginapahayag nga masobra 30 ka indibidwal ang nagakabit sa nasambit nga salakyan.
Nagapati man ini nga labaw sa penalidad nga pagatubangon sang driver sang jeep, kinahanglan nga masolusyunan man ang nasambit nga problema ilabi na nga dako ang posibilidad nga madamo pa nga mga pampubliko nga salakyan ang nagakarga sang subra sa ila seating capacity.
Suno sa iya, kinahanglan nga pasangkarun ang fleet management sa mga transport cooperatives ukon ang pagmonitor sa mga salakyan agud malikawan ang kaangay nga insidente.
Dugang man ni Geduspan, magakoordinar man ang ahensya sa Land Transportation Franchising and Regulatory Board (LTFRB) kag sa iban pa nga mga kooperatiba agud mahatagan ini sang nagakaigo nga igtalupangod.
