Na-validate na sang Land Transportation Office Region 6 ang pagkilala sa driver sang isa ka angkas rider nga ginreklamo sang pasahero, matapos nga ginhatagan sang impormasyon ang ahensya halin mismo sa biktima.
Ginapadayon subong ang proseso agud matutukan ang reklamo kag masiguro ang hustisya para sa pasahero.
Sa interview sang Bombo Radyo kay Jeck Conlu, Assistant Regional Director sang LTO-6, ginpahayag niya nga na-contact na nila ang biktima kag base sa mga detalye nga ginhatag sini, gin-check nila sa system kag na-identify man ang driver.
Suno sa iya, taga-Aklan ang amo nga driver.
Gindugang pa ni Conlu nga matapos ang pagproseso sang “Show-cause order”, ipadala ini sa address sang driver. May kahigayunan man ang driver nga magpadulong sa opisina sang LTO agud magpahayag sang iya sabat sa reklamo.
Ginpabutyag sang LTO nga padayon ang ila pagmonitor sa mga reklamo nga may kaangtanan sa public safety.
