Napaandam ang Land Transportation Office Region 6 (LTO-6) sa mga motorista nga mahimo bawion ang ila driver’s license kon ma-involve sa mga insidente nga nagalapas sa mga patakaran sa pedestrian lane, bilang kabahin sang mas hugot nga tikang sang ahensya para maprotektahan ang mga indibidwal nga nagatabok sa karsada.
Sa interview sang Bombo Radyo Iloilo kay LTO-6 Regional Director Atty. Gaudioso Geduspan II, iya ginpahayag nga isa sa pinakapanguna nga patakaran sa dalan amo ang pagkilala sa pedestrian lane bilang luwas nga alagyan sang mga nagatabok.
Suno kay Atty. Geduspan, dapat nahibaluan ini sang tanan nga motorista bangud nga makahatag gid sang daku nga peligro sa kabuhi kag kaluwasan sang mga pedestrians ang kapabayaan sang mga motorista sa dalanon.
Pahayag pa sang direktor nga madamo na nga mga insidente ang nagakatabo sa pedestrian lane, lakip na ang pagkabunggo, pagka-ipit pagkadisgrasya sang mga nagatabok.
Bangud sini, kabahin sa pagpatuman nga patakaran amo ang one-strike license revocation policy kun sa diin mangin pahanumdom sa mga motorista nga may mabug-at nga konsekwensya ang paglapas sa mga patakaran nga nagaprotekta sa mga pedestrian.
Dugang pa niya, ginpanugyanan ang tanan nga motorista nga magdoble halong sa pagpadalagan sang ila mga salakyan kag maghatag sang prayoridad sa kaluwasan sang mga pedestrians.
