ILOILO CITY- Nagsugod na sa pagpangdakop ang Land Transportation Office Region 6 sa mga motorista nga nagahimo sang overspeeding sa Traffic Discipline Zone sa Senator Benigno Aquino Jr. Avenue, Mandurriao, Iloilo City.
Sa interview sang Bombo Radyo kay Land Transportation Office- Region 6 OIC- Director Atty. Gaudioso Geduspan,iya ginpahayag nga humalin kahapon, Pebrero 12, naglab-ot na sa 20 ang mga nadakpan nga nagalapaw sa 50 km per hour nga speed limit.
Suno kay Geduspan, high- tech ang ila ginagamit nga speed gun sa pagtumod sa naga-overspeed nga salakyan.
Ini nga speed gun suno pa sa iya ang sarang mag-capture sang imahe kag video sang salakyan kag makapagwa sang resulta.
Katuyuan sini nga may mapakita ang talatapan nga pamatuod sa tion nga magreklamo ang isa ka motorista nga gindakop bangud sa overspeeding.
Samtang plano naman sang Land Transportation Office nga i-extend pa sa gwa sang traffic Discipline Zone ang pagpangdakop sa mga naga-overspeed nga motorista.
Suno kay Geduspan, ila na subong gina-identify ang mga national highways nga masami ginaluntaran sang roadcrash incidents kaangay sang Tigbauan kag Sta Barbara agud mabantayan sang mga law enforcers.
Target man sang talatapan suno pa kay Geduspan nga mas madamo ang ma-deputized kaangay sang Philippine National Police kag mga Local Government Units agud mas mapatuman sang maayo ang pagdakop sa mga violators.
