Ginklaro sang Land Transportation Office VI nga padayon ang ila nga pagpangdakop sa mga colorum kag iban pa nga mga salakyan nga nagapalas sa layi.
Sa interview sang Bombo Radyo kay Atty. Gaudioso Geduspan II, Regional Director sang Land Transportation Office VI, iya ginpahayag nga halin sang Oktubre 2025, yara na sa 32 ka mga colorum ang ila nadakpan sa siudad sang Iloilo.
Sabat ini sang opisina kasunod sang reklamo ni Halley Alcarde, Vice President sang Western Visayas Alliance of Transport Cooperatives and Corporations Inc., nga ang mga naga-overload lang nga mga modernized jeepney ang ginabantayan sang LTO.
Nagpanawagan anay si Alcarde sa ahensya nga mangin patas sa ila nga pagpatuman sang mga polisa.
Suno naman kay Geduspan, wala nila ginapili kun sin-o ang nagakadapat nga dakpon ukon hatagan sang penalidad, apang isa sa mga kinahanglan sa subong nga i-address amo ang pag-overload ukon pagpugok sang mga pasahero sa sulod sang mga mini-bus.
Madumduman nga mas nangin hugot ang pagpatuman sang Anti-Sardinas policy matapos nga naglapta sa social media ang video sang isa ka overloaded nga modernized jeep sa syudad.
