Posible nga i-revoke sang Land Transportation Office (LTO) 6 ang licensya ni Former Mayor Badong Divinagracia sang Calinog, Iloilo matapos nga ma-hit and run sini ang 19-anyos nga lalaki nga gintunaan sang kamatayon sini.
Sa interview sang Bombo Radyo kay LTO 6 Director Atty. Gaudioso P. Geduspan II, iya ginpahayag nga bisan wala pa nakabaton sang pormal nga reklamo ang ila opisina angut sa nasambit nga insidente, posible gihapon nga i-revoke ang licensya sang anay alkalde ilabi na nga malayo ang ginluntaran sang insidente kag kun sa diin ini nadakpan.
Suno kay Atty. Geduspan, ang mga hit-and-run cases ginakabig nga negligence of obligation, bangod ginabayaan sang driver ang iya responsibilidad sa biktima.
Pahayag sini, bisan ano pa ang rason sang driver sa natabo nga vehicular accident kun makita nga may negligence sa pagmaneho, mahimo ini nga mangin basehan agud hatagan sang show cause order ang driver kag posible man nga ma-revoke ang iya driver’s license.
Dugang pa sang Director nga ang amo nga insidente nagapakita nga madamo pa gihapon nga mga driver ang kulang sa disiplina sa dalan, bisan may yara na sang mga layi nga ginapatuman ang gobyerno para sa road safety.
Words by: Bombo Krylle Melliza
