ILOILO- Wala gihapon nakapagwa sang desisyon ang Land Transportation Office tuhoy sa pag-extend sang suspension ukon pag-revoke sang lisensya sang driver sang Mazda MX5 sports car nga nakabunggo patay sa mag-asawa nga principal kag manunudlo sa Sen. Benigno Aquino Jr., Avenue, Mandurriao, Iloilo City.
Ang mga biktima amo sanday Joe Marie Osano, Principal sang Lapaz II Elementary School kag Alnie Dinah Pet Osano, Master Teacher sang Ticud Elementary School, lunsay residente sang Leofel Subdivision Brgy. Ticud La Paz Iloilo City samtang ang suspek naman amo si June Paul Valencia, 32 anyos sang Villa Perla Subdivision Mandurriao Iloilo City.
Sa interview sang Bombo Radyo kay Jojo Jamerlan, deputy chief for Operations sang Land Transportation Office- Region 6, iya ginpahayag nga nagahimo palang sila sang report agud ipasa sa Regional Director para ma-evaluate.
Suno kay Jamerlan, si Land Transportation Office- 6 Regional Director Roland Ramos ang magadesisyon kun i-revoke ukon i-extend gid man ang lisensya ni Valencia.
Matandaan nga napaslawan si Valencia nga magtambong sa preliminary investigationkag wala man ini makapasa sang sabat sa show cause order sang Land Transportation Office.
Gina-alegar nga nakaguwa na sa pungsod si Valencia sang Hunyo 20 padulong sa San Fransisco, California matapos ini maghingyo sa Land Transporation Office sang Hunyo 19 nga i-extend sa 15 ka adlaw ang deadline sang iya sabat bangud yara pa ini sa mental confusion.
