Ginkadismaya ni Land Transportation Office (LTO) VI director Atty. Gaudioso P. Geduspan II ang nangin lihok sang Pavia Municipal Police Station sa kaso sang pagpatay sa iya stay-in driver.
Ang biktima amo si Wilmer Casquite Villaros, legal ang edad, kasado, residente sang Janiuay, Iloilo, apang temporaryo nga nagatinir sa amo nga subdivision.
Samtang ang mga suspek, amo sanday Jay-R, 40, kag Boy, 45, kag residente sang Barangay Aldeguer, Sara, Iloilo.
Sa interview sang Bombo Radyo kay Atty. Geduspan, iya ginpahayag nga bisan siya ang indi makasabat sa palamangkutanon nga kon ngaa wala ginhulag sang kapulisan ang na-una niya nga blotter kaangot sa armas sang mag-utod nga suspek.
Suno kay Geduspan, wala na-applyan sang Pavia PNP sang search warrant ang mag-utod antes pa man ang insidente.
Dugang sini nga kon nahatagan sang search warrant, wala na kontani napatay ang iya tinawo.
Ginlaragway man sini nga ‘it’s too late already’ ang nangin responde sang kapulisan sang Pavia bangud napatay na ang iya nga driver.
Gintuad man sang natungdan nga mismo ang gingamit nga armas-luthang sang mga suspek sa pagpatay kay Villaros, ang armas man nga ginpa-blotter sini.
Nagpanugyan man si Geduspan sa mga kapulisan nga ubrahon ang ila katungdanan agud nga indi na masulit ang amo nga insidente.
Nahibaluan nga gin-implementar ang search warrant kagab-i kon sa diin, ginlakipan sang pila ka otoridad kag witnesses, apang wala na-recover ang armas-luthang.
Gin-athag man liwat sang Pavia PNP nga ginpatuman ang search warrant bangud wala sang recoveries sa mga suspek sang sila ang nadakpan sa Sara, Iloilo.
Wala naman ginadula sang talatapan ang posibilidad nga mahimo ginbilin sang mag-utod ang pusil samtang sila ang nagapalagyo padulong sa Sara, Iloilo.
