ILOILO CITY – Ginasigurado sang Land Transportation Office (LTO) – Western Visayas ang seguridad sang mga pasahero nga nagabyahe ilabi na subong nga tigkalalag.
Ini ang paagi sa pagbutang sang “Malasakit Help Desk” sa tagsa ka terminal sang bus kag jeep halin Oktubre 22 tubtob Nobyembre 6, Mierkules nga adlaw.
Sa interview sang Bombo Radyo kay Ms. Riza Otayde, Public Information Officer (PIO) sang LTO, iya ginpahayag nga may ara sang inspector nga magasekyar sang mga posible depekto sang jeep kag bus, kag kon may ara sang makit-an, igasuspende ang byahe sini.
Suno kay Otayde, ginakabig nga complete package ang Malasakit Help Desk.
Dugang niya, 24 oras ang ila nga pagbantay lakip na sa mga driver sang taxi nga nagapamalibad sa pagpasakay sang mga pasahero nga malapit lang ang kadtuan.
Indi man makalusot suno kay Otayde ang mga driver nga positibo sa droga bangud may ara sang random check kag joint operation nga ginapatigayon ang LTO kaupod ang Philippine Drug Enforcement Agency (PDEA) kag Philippine National Police (PNP).
Kaangot sa sini nga tikang, igapaidalom sa urine test ang isa ka driver kag sa tion nga mangin positibo sa droga, iga-kumpiska sang LTO ang iya lisensya.
Suno kay Otayde, subong nga adlaw, ginhimo ang random check sa Pavia Peoples’ Terminal kag sa terminal sa Brgy. Camalig, Jaro.
Ginalauman sang LTO ang mga reklamo sang mga tawo bangud sa posible delay nga magluntad, apang ginaayo sang amo nga pamunuan nga kon mahimo, magkooperar ang publiko bangud ginasigurado lang nila ang seguridad sang mga ini.
