Gin-grant na sang Land Transportation Office (LTO) ang hingyo nga 15 ka adlaw nga extension ni June Paul Valencia,32 anyos sang Villa Perla Subdivision, Mandurriao, Iloilo City para magsabat sa show cause order nga ginpapanaog sang nasambit nga ahensiya.
Si Valencia ang driver sang Mazda MX5 sportscar nga nakabunggo-patay sa mag-asawa nga principal kag manunudlo sa Senator Benigno Aquino Jr. Avenue, Mandurriao, Iloilo City.
Sa interview sang Bombo Radyo Iloilo kay Riza Otayde,spokesperson sang LTO-6, iya ginpahayag nga bangud sa humanitarian consideration, gin-aprubahan sang Operations Division sang LTO-6 ang hingyo ni Valencia nga extension bangud nga may yara pa ini sang mental confusion sa diin na-trauma ini sa natabo nga aksidente nga ginkamatay sang mag-asawa nga Joe Marie Osano, 49, principal sang Lapaz II Elementary School kag asawa nga si Alnie Dinah Osano, Master teacher II. 45, Master Teacher II sang Ticud Elementary School.
Suno kay Otayde, nag-umpisa kahapon,Hunyo 24 tubtob Hulyo 8 ang ginhatag nga extension kay Valencia.
Magadepende naman suno kay Otayde sa mangin sabat ni Valencia ang desisyon sang LTO kun i- revoke sang permanente ang iya lisensiya matapos nga ginsuspend ini sa sulod sang tatlo ka bulan.
