Gin-revoke sang Land Transportation Office Region (LTO) ang lisensya sang apat ka public utility vehicle (PUV) drivers nga natukiban nga positibo sa iligal nga droga kadungan sang ginpatigayon nga surprise inspection sa mga terminal sa syudad sang Iloilo.
Ini ginalakipan sang isa ka taxi driver, isa ka tricycle driver, kag duha ka modernized jeepney drivers.
Nagpositibo sila sa paggamit sang shabu kadungan sang Oplan Harabas nga ginhimo sang LTO Region 6 sa bus terminals sa Barangay Camalig, Jaro kag sa Mohon, Arevalo sang nagligad nga Abril 15.
Base sa order sang opisina, ipatuman gilayon ang revocation; magluwas pa sang lifetime disqualification sa pag-angkon sang driver’s license.
Apang sa interview sang Bombo Radyo kay Mr. Jeck Conlu, assistant regional director sang LTO Western Visayas, iya ginpahayag nga may tyansa pa man nga mag-apelar ang mga involved nga driver, apang magadepende sa gihapon ini sa desisyon sang central office.
Suno kay Conlu, ini nga tikang sang opisina ang nagapakita sang seryoso nga pagtuman sa transport safety standards ilabi na sa PUV drivers kun sa diin nakadepende ang kabuhi sang iban nga mga tawo nga nagabyahe.
Matandaan nga sang Mayo 29, may yara man sang tricycle driver nga nagpositibo sa paggamit sang illegal drugs kadungan sang random drug test sa Ungka kag Tagbak terminals diri sa syudad.
Ginpahayag sang transportation official nga hulaton sang regional office ang confirmatory test results, magahimo sang rekomendasyon, kag ipadala man sa central office.
Nahibaluan nga ang ginapatigayon nga Oplan Harabas ang kabahin sang kampanya sang Department of Transportation kasunod sang mandu sang presidente para sa road safety sa bilog nga Pilipinas.
(Photo: LTO Region 6)
