ILOILO CITY– Gina amat-amat na subong sang Land Transportation Office ang pagpatigayon sang online application para sa pag-renew sang driver’s license sa tagsa ka field offices sa Western Visayas.
Sa interview sang Bombo Radyo kay Land Transportation Office 6 Regional Director Eric Tabaldo, iya ginpahayag nga ginahitso pa ang sistema agud mas mahapos ang proseso para sa mga kliyente.
Suno kay Tabaldo, naga-umpisa naman ang online transaction sa satellite office sa Roxas City, Capiz kag igasunod naman ang iban pa nga talatapan.
Sa bahin naman sang new applicants, kinahanglan nga magpadulong mismo sa talatapan sang Land Transportation Office bangud may yara sang patigayunon nga examination lakip na ang finger printing.
Sa mga may expired license kag madugay na nga wala na renew, kinahanglan nga magpaidalom sa re-examination sa pagkuha sang bag-o nga lisensya.
Gin-athag man ni Tabaldo nga indi anay pagdayunon ang pagpatuman sang doble plaka sa mga motorsiklo kutob nga indi mahisto kag mabalik sa normal ang produksyon sang mga plaka.
Sa pagkamatuod suno kay Tabaldo, ginapadasig na ang produksyon sang mas dako nga plaka kag may yara na sang color coding kun sa diin purple ang color code sang Western Visayas.
Sa atubang nga bahin sang motorsiklo, sa baylo nga metal nga plaka, decals na lang ang igabutang agud malikawan ang aksidente.
Nahibaluan nga ang bag-o nga plaka sa likod ang may kadakuon nga 235mm x 135mm samtang ang decals naman sa atubang ang may kadakuon nga 135mm x 85mm.
Santo sa layi, ang mga motorsiklo nga ginabaligya ang kinahanglan marehistro na sa sulod sang lima ka adlaw.
