ILOILO CITY- Natalana na nga i-turn over sang Land Transportation Office (LTO) Region 6 sa Iloilo City Police Office (ICPO) ang 11 tanan ka mga alcohol breath analyzer machines nga gamiton sa full implementation sang Anti Drugged and Drunk Driving Law.
Pinaagi sa amo nga machine, ma-determinar kun nakainom sang makahulubog nga ilimnon ang isa ka driver nga involved sa aksidente kag mahimo magamit nga ebidensya sa tion sang pagpasaka sang kaso.
Sa interview sang Bombo Radyo kay Atty. Gaudioso Geduspan, Assistant Regional Director sang LTO-6, iya ginpahayag nga 25 ka alcohol breath analyzer device ang nag-abot sa ila gikan sa LTO Central Office apang 11 lang ang ihatag sa ICPO bangud ini man ang numero sang ICPO personnel nga deputized sa paggamit sini.
Suno kay Geduspan, sunod naman nga ipang-deputize amo ang mga personnel sang Iloilo Police Provincial Office (IPPO).
Ginpahayag ni Geduspan nga ang 14 naman ka mga alcohol breath analzyers ang gamiton sang mga personnel sang LTO Region 6.
