ILOILO CITY – Wala sang dinakpanay nga natabo kadungan sang ginpatigayon nga information drive sang Land Transportation Office, Land Transportation Franchising and Regulatory Board kag Highway Patrol Group sa syudad sang Iloilo subong nga adlaw, Setyembre 25.
Sa interview sang Bombo Radyo kay LTO Region 6 Director Eric Tabaldo, iya ginpahayag nga maga-umpisa sa Lunes, Setyembre 28, ang istrikto nga pagpatuman sang 1-meter nga physical distance sa mga de-pampasahero nga salakyan.
Suno kay Tabaldo, kaina sang aga, information drive pa lang ang ginhimo agud pahibaluon ang mga driver nga sundon gid ang 1-meter physical distance sa tanan nga Public Utility Vehicle.
Ginpahayag ni Tabaldo nga kinahanglan nga magkooperar ang tanan nga driver kag operator bangud nga ini ang ginmandu ni Presidente Rodrigo Duterte.
Suno naman kay LTFRB Region 6 Director Richard Osmeña, ginatinguhaan niya nga mapaaprobahan sang central office ang petisyon sang mga transport groups nga pasakaan ang minimum fare kadungan sang pagpatuman sang 1-meter physical distance.
Ginpahayag ni Osmeña nga nahangpan gid niya kun ano ka bug-at para sa mga driver kag operator ang pagbuhin sang passenger capacity.
Sa subong suno kay Osmeña, kinahanglan gid nga ipatuman ang nasambit nga pagsulundan ilabi pa nga ginpaidalom sa Modified Enhanced Community Quarantine ang syudad sang Iloilo.
