LTO Region 6 handa nga suportahan ang ginaduso sang ICPO nga butangan sang numero ang mga helmet sang motorista sa tion nga ini na ang mangin ordinansa sa Iloilo City

Handa ang Land Transportation Office (LTO) Region 6 nga suportahan ang ginaduso nga rekomendasyon sang Iloilo City Police Officce (ICPO) sa pagbutang sang mga numero sa helmet sang mga motorista sa syudad sang Iloilo.

Ini ang nakit-an sang ICPO nga isa sa mga solusyon agud madasig nga makilal-an ang motor-riding suspect ukon masolbar ang krimen.

Magluwas sa pagbutang sang numero sa helmet sang mga motorista, butangan man sang identification sticker sa atubang kag likod sang motorsiklo kag magapahamtang sang toll gates sa guwa kag sulod sang syudad sa diin may yara sang camera sa ibabaw, sa tunga kag sa idalom agud nga makita ang sticker, helmet kag plate number sa tion nga may matabo nga insidente.

Sa interview snag Bombo Radyo kay Atty. Gaudioso Geduspan, Asst. Regional Director sang Land Transportation Office Region 6, iya ginpahayag nga sa tion nga mangin ordinansa na sa syudad ang ginaduso sang ICPO, magabulig ang ahensya sa pagpatuman sini.

Mahimo man nga mangin kabahin ang LTO Region 6 sa diskusyon natuhoy sa nasambit nga plano.

Apisar magadugang ini sa katungdanan sang ahensya amo man sa mga traffic enforcers kag kapulisan, gin-abi abi ini sang LTO bangud makabulig ini sa pagpahagan-hagan sang krimen sa syudad.